Ո՞վ է Մարվելի ամենացինիկ, հումորով, շատ արագ վերականգնվող ու «ճմռթված» սուպերհերոսը… Դե հա, դժվար չէ գլխի ընկնել, որ խոսքը Դեդփուլի մասին է։

Հակահերոս, որ իրական սուպերհերոսի է վերածվել. դեռ 1991 թվականին կոմիքսներում հայտնված այս կերպարն իր յուրահատուկ հումորով, անսովոր պահվածքով ու որոշումներով գրավել է երկրպագուների սրտերն ամբողջ աշխարհում: Ուեյդ Ուիլսոնը, նախկին վարձու մարդասպանը, ենթարկվում է մի փորձարկման, որի արդյունքում ստանում է արագացված բուժման կարողություններ, բայց փոխարենը կորցնում է իր նախկին արտաքին տեսքը. նրա մաշկը ճմռթվում և վնասվում է։ Ինչպես ինքը Դեդփուլն է ասում՝ "I’m not a hero. I’m a bad guy who gets paid to f*ck up worse guys."

👉 Ինչու՞ ենք ընտրում Դեդփուլին

Դե լավ, արագ ռեգեներացիայով ոչ ոքի չես զարմացնի, Մարվելի մի շարք սուպերհերոսներ ևս ունեն այս կարողությունը, օրինակ՝ Գրուտը։ Այս դեպքում ինչն է Դեդփուլին յուրահատուկ դարձնում։ Միանշանակ կարող ենք ասել, որ այս կերպարի առանձնահատկությունը նրա անհատականությունն է, որն արտահայտվում է սուր հումորի զգացողության մեջ, ինչպես նաև չորրորդ պատը կոտրելու կարողությունն ու փոփ-մշակույթին չափազանց տեղին ու ծիծաղելի հղումները։

Այո, Դեդփուլին ամենաբնորոշ հատկություններից մեկն այն է, որ նա գիտակցում է, որ ինքը կոմիքսի/ֆիլմի կերպար է: Այս ինքնագիտակցությունը թույլ է տալիս նրան կոտրել չորրորդ պատը, ուղղակիորեն դիմելով հանդիսատեսին և կատարելով մեթա մեկնաբանություններ սուպերհերոսական ժանրի մասին: Այս խաղային փոխհարաբերությունը լսարանի հետ հումորի և անկանխատեսելիության շերտ են ավելացնում նրա պատմություններին, առանձնացնելով նրան այլ հերոսներից:

👉 Ընտանիքն՝ ամեն ինչից վեր

Չնայած Դեդփուլը հայտնի է իր միայնակ հակահերոսի կերպարով, նա ունի հարուստ և բազմաշերտ ընտանեկան պատմություն: Դեդփուլի ընտանիքը ներառում է մի շարք անսովոր և հետաքրքիր կերպարներ, որոնք մեծ ազդեցություն են ունեցել նրա կյանքի և արկածների վրա, թեև ոչ բոլորն են ներկայացված ֆիլմերում, բայց կոմիքսների սիրահարները հաստատ կհիշեն նրանց։

Վանեսա Կարլայլ (Copycat)
Վանեսան Դեդփուլի առաջին մեծ սերն էր: Նա մուտանտ է, ով կարող է փոխել իր արտաքին տեսքը և ընդօրինակել այլ մարդկանց ուժերը: Նրանց հարաբերությունները բարդ էին, լի սիրով ու դավաճանությամբ: Վանեսան եղել է Դեդփուլի կյանքի կարևոր մասը՝ տալով նրան մարդկային զգացմունքների և խորը կապվածության փորձ:

Էլի Քամիլլա Ուիլան
Դեդփուլի աղջիկը՝ Էլի Քամիլլա Ուիլանը, ում ավելի հաճախ ճանաչում են որպես «Էլի», ևս նշանակալի դեր է խաղացել նրա կյանքում: Չնայած Դեդփուլը չի ճանաչել իր աղջկան նրա մանկության տարիներին, նրա հայտնվելը կարևոր փոփոխություն է բերել Դեդփուլի կյանքում։

Բոբ, Հիդրայի գործակալ
Բոբը՝ Հիդրայի նախկին գործակալը, Դեդփուլի հավատարիմ ընկերներից է: Նա հաճախ մասնակցում է Դեդփուլի արկածներին և, չնայած նրա վախերին ու թուլություններին, ցույց է տալիս մեծ հավատարմություն և նվիրվածություն: Բոբը հաճախ է հումորային իրավիճակներ ստեղծում՝ ավելացնելով կատակերգական տարրեր Դեդփուլի պատմություններին:

Նեյթան Սամերս (Քեյբլ)
Քեյբլը՝ Նեյթան Սամերսը, ապագայից եկած մուտանտ է, ով հաճախ է աշխատել Դեդփուլի հետ: Նրանց հարաբերությունները բարդ են, լի հակասություններով և փոխադարձ հարգանքով:

Ուեյսթեն Ուիլսոն (Օրիմ)
Ուեյսթենը՝ Դեդփուլի կրտսեր եղբայրը, նաև մուտանտ է և հանդես է գալիս Օրիմ անունով: Նրա հետ կապված պատմությունները հաճախ մութ են ու հուզիչ, և նրանց հարաբերությունները բարդ են՝ լցված անցյալում հասցրած վերքերով և ընտանեկան կապերով:

Դեդփուլի ընտանիքը և ընկերները նրա պատմությունների անբաժանելի մասն են՝ ավելացնելով խորություն և բազմազանություն նրա կերպարին: Նրանց հետ կապված պատմությունները ցույց են տալիս Դեդփուլի մարդկայնությունը, զգացմունքները և նրա անսպասելիորեն նրբանկատ բնույթը, որը հաճախ թաքնված է հումորի և քաոսի ներքո:

👉 Դեդփուլը՝ ֆիլմերում

Դե լավ, վերադառնանք ֆիլմարտադրություն։ Առաջին «Դեդփուլ» ֆիլմը (2016) Ռայան Ռեյնոլդսի մասնակցությամբ, փոփոխություն մտցրեց սուպերհերոսական ֆիլմերում: Այն ստացավ R-վարկանիշը, ինչը թույլ տվեց ցուցադրել ավելի հասուն բովանդակություն՝ ներառյալ բռնություն և մեծահասակների հումոր: Ֆիլմի հաջողությունն ապացուցեց, որ կա մեծ լսարան՝ անսովոր սուպերհերոսական պատմությունների համար: Ռեյնոլդսի Դեդփուլի կերպարն արժանացավ համընդհանուր գովասանքի՝ գրավելով կերպարի էությունը և կյանքի կոչելով նրան բնորոշ հումորը: Շարունակությունը՝ «Դեդփուլ 2»-ը (2018), շարունակեց այս հաջողությունը՝ ֆիլմում ներկայացնելով նոր կերպարներ, ինչպիսիք են Քեյբլը և Դոմինոն, ընդլայնելով Դեդփուլի տիեզերքը:

Մի քանի տարի առանց Դեդփուլի նոր արկածների մնալուց հետո, արդեն այս տարի՝ հուլիսի 25-ին կկայանա «Դեդփուլ և Կուղխ» ֆիլմի պրեմիերան։ Այո-այո, Դեդփուլին կմիանա մեզ արդեն շատ ծանոթ Վուլվերինը (հայերեն թարգմանությունը՝ Կուղխ) և նրանք միասին կփորձեն փոխել պատմության ընթացքը։

👉 Ինչ սպասել նոր ֆիլմից

Թեև սյուժեի մանրամասները դեռ փակ են, երկրպագուները կարող են սպասել վայրի ճանապարհորդություն, որը լի է հումորով, անսպասելի զարգացումներով և չորրորդ պատը կոտրող պահերով: Ֆիլմը, հավանաբար, կանդրադառնա քավության և ընկերության թեմաներին, քանի որ երկու կերպարներն էլ հայտնի են իրենց դժվարին անցյալներով և բարդ սկզբունքներով: Բացի այդ, Վուլվերինի մասնակցությունը թույլ կտա ֆիլմին ուսումնասիրել նրանց պատմությունների ավելի մութ և ավելի հուզիչ կողմերը՝ հավասարակշռելով հումորն ավելի խորը, ավելի սրտառուչ պահերով:

Ամփոփելով, Դեդփուլի ուղին՝ կոմիքսների էջերից դեպի մեծ էկրան, կարելի է ասել, որ կերպարն ամբողջական է և շատ սիրված երկրպագուների կողմից։ Նրա նոր արկածները կարող ես դիտել հաշված օրերից՝ հուլիսի 25-ից ԿինոՊարկում։ Այնպես որ վերցրու չիմիչանգան (կամ պոպկորն) և պատրաստվիր հետաքրքիր փորձառության, որը խոստանում է լինել դիտարժան և հումորային: