Հոքինսի վերջին գիշերը․ «Stranger Things»-ի 5-րդ սեզոնի տեսությունները

🎬 Netflix-ի ամենահայտնի սերիալներից մեկը՝ «Stranger Things»-ը, մտել է իր եզրափակիչ փուլ։ Հինգերորդ սեզոնի առաջին չորս սերիաներն արդեն հասանելի են, և պարզ է դարձել մի բան՝ պատմությունը մոտենում է իր ամենամութ ու ամենաէմոցիոնալ կետին։ Սերիալը, որը սկսվեց որպես 80-ականների նոստալգիայով լցված արկած, այսօր վերածվել է մեծամասշտաբ դրամայի՝ մարդկային ընտրությունների, զոհաբերության և մանկության ավարտի մասին։ Ի՞նչ էր տեղի ունեցել նախորդ սեզոններում Պատմությունը սկսվում է 1983 թվականին՝ Հոքինս փոքրիկ քաղաքում, երբ անհետանում է Ուիլ Բայերսը։ Նրա ընկերները՝ Մայքը, Դասթինը և Լուկասը, որոնումների ընթացքում հանդիպում են խորհրդավոր աղջկան՝ Օդիին (Eleven), որը փախել էր գաղտնի լաբորատորիայից, որտեղ նրա վրա փորձեր էին անում։ Օդիի շնորհիվ երեխաները բացահայտում են «Հակառակ աշխարհը» (Upside Down)՝ զուգահեռ աշխարհ, որը լի է մութ էակներով ու անբացատրելի վտանգներով։ Յուրաքանչյուր սեզոնում սպառնալիքը մեծանում է, իսկ հերոսները ստիպված են լինում պայքարել ոչ միայն հրեշների, այլև սեփական վախերի, մեղքի ու կորուստների դեմ։ Չորրորդ սեզոնը դարձավ պատմության շրջադարձային կետը։ Բացահայտվեց գլխավոր չարագործի ինքնությունը․ Վեկնան իրականում Հենրի Կրիլն է՝ Բրենների լաբորատորիայի առաջին փորձարկվողը։ Նա եղել է Օդիի առաջին «ուսուցիչը», սակայն հենց Օդին է, որ նրան արտաքսել է «Հակառակ աշխարհ» բացելով դարպասը դեպի այդ մութ աշխարհը։ Այդ պահից սկսած այդ վայրը դարձել է Վեկնայի ստեղծած իրականությունը, իսկ նրա պարտությունը կարող է նշանակել ամբողջ այդ աշխարհի կործանումը։ Բայց, քանի որ կարդում ես այս բլոգը, ենթադրում ենք, որ այս ամենն արդեն իսկ լավ գիտես, այնպես որ անցնենք առաջ։ Որտեղի՞ց է սկսվում 5-րդ սեզոնը. (ՈՒՇԱԴՐՈՒԹՅՈՒՆ՝ սփոյլերներ) Գործողությունները տեղափոխվում են 1987 թվական։ Հոքինսը կիսաքանդ քաղաք է՝ շրջապատված ցանկապատերով և զինվորական վերահսկողությամբ։ «Հակառակ աշխարհը» շարունակում է ներթափանցել իրական աշխարհ, ինչպես հիվանդություն, որը դանդաղ տարածվում է ամենուր։ Օդին կրկին ստիպված է թաքնվել՝ այս անգամ արդեն կառավարությունից, որը նրան համարում է ազգային անվտանգության սպառնալիք։ Մոտենում է Ուիլի անհետացման տարելիցը, և հերոսները հասկանում են, որ սա վերջին հնարավորությունն է վերջ դնելու Վեկնային ու փակելու «Հակառակ աշխարհի» դարպասները։ 👉 Մնացած սերիաները Netflix-ը կթողարկի փուլերով՝ մինչև 2025 թվականի ավարտը, իսկ եզրափակիչ էպիզոդը խոստանում է լինել սերիալի ամենամասշտաբայինն ու ամենաերկարը։ Ամենաքննարկվող ֆան-տեսությունները 🔥 Ուիլը՝ եզրափակչի առանցքո՞ւմ Երկրպագուները վաղուց են նկատում, որ Ուիլի կապը «Հակառակ աշխարհի» հետ երբեք ամբողջությամբ չի կտրվել։ Նա առաջին երեխան էր, ով անցել էր այդ աշխարհով, և նույնիսկ վերադարձից հետո շարունակում է «զգալ» Վեկնային։ Հենց այդ պատճառով էլ շատերը վստահ են, որ հինգերորդ սեզոնում Ուիլը դառնալու է պատմության առանցքային կերպարներից մեկը։ Տեսություններից մեկի համաձայն՝ Ուիլը կարող է լինել Վեկնայի ամենախոցելի կետն իրական աշխարհում՝ մի տեսակ «կապ» կամ «ալեհավաք», որի միջոցով հնարավոր կլինի գտնել և վերջնականապես կանգնեցնել չարագործին։ Մյուս, ավելի մռայլ վարկածով՝ Վեկնան ժամանակավորապես կարող է օգտագործել Ուիլի կապը «Հակառակ աշխարհի» հետ՝ ստիպելով նրան ակամայից ծառայել իր նպատակներին։ 🧠 Մաքսը՝ «Հակառակ աշխարհում» փակված գիտակցություն Չորրորդ սեզոնի վերջում Մաքսը ֆիզիկապես փրկվեց, բայց նրա գիտակցությունը կարծես մնաց «Հակառակ աշխարհում»։ Երկրպագուները ենթադրում են, որ նա գտնվում է Վեկնայի ստեղծած հոգեբանական տարածքում և արդեն տեսել է այն, ինչ մյուս հերոսները դեռ չեն հասկացել։ Տեսություններից մեկի համաձայն՝ Մաքսը կարող է դառնալ միակ կերպարը, որն իսկապես հասկանում է Վեկնայի ներսի կառուցվածքը և նրա իրական վախերը։ Այդ պատճառով Օդին, հնարավոր է, ստիպված լինի ներթափանցել Մաքսի գիտակցության մեջ՝ վտանգելով սեփական հոգեկան կայունությունը, որպեսզի նրան վերադարձնի և միաժամանակ ստանա վճռորոշ տեղեկություն։ ⚡ Օդին՝ ոչ թե մենակ, այլ միասին Եթե նախորդ սեզոններում Օդին հաճախ էր մենակ պայքարում չարի դեմ, ապա հինգերորդում ֆաները սպասում են լրիվ այլ մոտեցման։ Կարծիք կա, որ այս անգամ հաղթանակը հնարավոր կլինի միայն համախմբման շնորհիվ։ Քննարկվում է նաև այն տարբերակը, որ Օդին կարող է կրկին կապ հաստատել իրեն նման կարողություններ ունեցող այլ մարդկանց հետ։ Այս տեսության համաձայն՝ վերջնական պայքարը լինելու է ոչ թե միայն ֆիզիկական ուժի, այլ՝ մտքի, կապի և փոխադարձ վստահության հաղթանակ։ 🪖 Երկու թշնամի՝ Վեկնան և պետությունը Շատ ֆաներ համոզված են, որ այս սեզոնում վտանգը միայն «Հակառակ աշխարհից» չէ գալիս։ Զինվորականների և պետական կառույցների ակտիվ ներկայությունը Հոքինսում հուշում է, որ հերոսները ստիպված են լինելու պայքարել նաև մարդկային վերահսկողության և փորձերի դեմ։ Տեսություններից մեկի համաձայն՝ վերջնական փուլում կարող է առաջանալ իրավիճակ, երբ հերոսները պետք է ընտրեն՝ պայքարել Վեկնայի՞, թե՞ պետական մեքենայի դեմ, կամ նույնիսկ ժամանակավոր դաշինք կնքել՝ ավելի մեծ չարիքը կանգնեցնելու համար։ ⏳ Ժամանակի հետ խաղ՝ ոչ դասական ձևով Ժամանակի ճանապարհորդության թեման վաղուց է շրջանառվում ֆան-համայնքներում, բայց շատերը կարծում են, որ սերիալը չի գնա ուղիղ «անցյալ գնալու» ճանապարհով։ Ավելի հավանական է, որ ժամանակի հետ խաղն արտահայտվի հիշողությունների, տեսիլքների և անցյալի վերաիմաստավորման միջոցով։ Ըստ այս տեսության՝ Վեկնային հաղթելու բանալին գտնվում է անցյալում՝ ոչ թե այն փոխելու, այլ ճիշտ հասկանալու համար։ 💔 Անխուսափելի կորուստներ Եզրափակիչ սեզոնից սպասվում են իրական զոհեր։ Ամենահաճախ քննարկվող անուններն են Սթիվը, Մաքսը և նույնիսկ Օդին։ Շատերը համոզված են, որ պատմությունն առանց զոհաբերության ավարտ չի ունենա, և ինչ-որ մեկը ստիպված կլինի իր կյանքը տալ Իզնանկայի փակման համար։ 💞 Սիրային եռանկյունին վերջապես կլուծվի Երկրպագուները սպասում են, որ Նենսի-Ջոնաթան-Սթիվ գիծն այս սեզոնում վերջապես կփակվի։ Տարիներ շարունակ ձգվող այս պատմությունը չի կարող անավարտ մնալ եզրափակիչում։ Երկրպագուները նկատում են, որ լարվածությունն արդեն այլ բնույթ ունի․ խոսքը ոչ թե խանդի, այլ հասուն ընտրության մասին է։ Ստեղծագործական թիմի ակնարկներով՝ լուծումը լինելու է ոչ թե հանկարծակի ռոմանտիկ քայլ, այլ գիտակցված որոշում, որը կարտացոլի կերպարների աճը և պատմության տրամաբանական ավարտը։ Սա իսկապե՞ս ավարտն է... Հինգերորդ սեզոնը վերջնական է հիմնական սերիալի համար, սակայն «Stranger Things»-ի աշխարհը շարունակում է ապրել։ Արդեն ներկայացված է թատերական պրիքվելը՝ «The First Shadow», իսկ 2026-ին սպասվում է անիմացիոն սփին-օֆֆը՝ «Stranger Things: Tales From ’85»։ Բայց, թվում է, թե հենց այս սեզոնն է, որ կփակի բոլոր բաց հարցերը և կդնի վերջակետ Հոքինսի պատմությանը։ Դե սպասենք սերիալի նոր էպիզոդներին, իսկ մինչ այդ մեկնաբանություններում կիսվեք, թե ինչ եք մտածում սերիալի մասին։